Билим, ҳамжиҳатлик ва 5 минг қадам: экология қурултойининг иккинчи куни қандай ўтди?
Қашқадарёда халқаро экология қурултойи доирасидаги тадбирлар давом этмоқда.
Қашқадарё вилояти Шаҳрисабз туманидаги «Лочин» болалар оромгоҳида “Ёшлар — келажак бунёдкорлари” В халқаро экология қурултойининг иккинчи куни ҳам мазмунли ва қизиқарли тадбирларга бой ўтди.
Кун аввалида хорижий ҳамда маҳаллий иштирокчилар учун экология йўналишида ўқув машғулотлари ва семинарлар ташкил этилди. Унда ёшлар атроф-муҳитни муҳофаза қилиш, экологик муаммоларнинг олдини олиш ҳамда уларнинг замонавий ечимлари бўйича турли маълумот ва тавсияларга эга бўлди. Машғулотларда хорижий иштирокчилар билан тажриба алмашиш учун ҳам имконият яратилди.
Тушликдан сўнг эса қурултой иштирокчилари учун ўзига хос кўргазма ташкил этилди. Унда Ўзбекистоннинг турли ҳудудларидан ташриф буюрган ёшлар ўз вилоятларининг табиий, маданий ва экологик жиҳатдан ўзига хос томонларини намойиш этди. Ҳар бир ҳудуд ўзига хос ёндашув асосида кўргазма ташкил этиб, ташриф буюрувчиларга вилоятининг қадриятлари ва анъаналарини таништирди.
Кўргазмадан сўнг ёшлар иштирокида 5 минг қадам юриш акцияси ташкил этилди. Экологик тарғибот ва соғлом турмуш тарзини уйғунлаштирган ушбу ташаббусда қурултой иштирокчилари биргаликда юриб, атроф-муҳитга эътибор ва экологик маданиятни тарғиб қилди.
Кун якунида эса “Ёшлар — келажак бунёдкорлари” V халқаро экология қурултойининг расмий очилиш маросими бўлиб ўтди. Тантанали тадбирда таниқли санъаткорлар ва шоу-бизнес вакиллари иштирок этиб, ёшлар учун концерт дастурини намойиш этди.
Шу тариқа, қурултойнинг иккинчи куни иштирокчилар учун нафақат янги билим ва тажриба, балки турли ҳудудлар билан яқиндан танишиш, халқаро дўстлик ва ҳамкорликни мустаҳкамлаш имконини берди.
