Июль АҚШ тарихидаги энг иссиқ ой бўлди

Июль ойи АҚШ континентал қисмида 1895 йилдан, яъни метеорологик кузатувлар мунтазам қайд этила бошланганидан буён энг иссиқ ой сифатида қайд этилди. Бу ҳақда CBS News Миллий океан ва атмосфера бошқармаси (NOAA) маълумотларига таяниб хабар берди.

 

Маълумотларга кўра, июль ойида мамлакат бўйича ўртача ҳарорат 76,9°F (24,9°C) ни ташкил этган. Бу 1936 ва 2012 йилларда қайд этилган аввалги июль рекордидаги кўрсаткичдан 0,1–0,2 даражага юқори.

 

Айниқса, Айдахо, Юта, Вайоминг ва Монтана штатларида юқори ҳароратлар кузатилиб, айрим ҳудудларда тарихий рекордлар янгиланган.

 

Июль ойида нафақат кундузги, балки тунги ҳарорат ҳам юқори бўлган. Ўртача тунги ҳарорат 64,2°F (17,9°C) га етиб, 2022 йилда қайд этилган аввалги рекорддан 0,7 даражага юқори кўрсаткични ташкил қилган.

 

Ой бошида бошланган кучли иссиқлик тўлқини 185 миллиондан ортиқ кишига таъсир кўрсатган. Юқори ҳароратлар сабаб кўплаб оммавий тадбирлар бекор қилинган ёки бошқа муддатга қолдирилган.

 

Шу билан бирга, мамлакат бўйича ўртача ёғингарчилик миқдори кузатувлар тарихидаги учинчи энг паст кўрсаткич бўлган. Айрим ҳудудларда эса ҳаддан ташқари иссиқлик кучли ёмғир ва сув тошқинлари билан бирга кузатилган. Техас Ҳилл Кантри ва Нью-Йорк штатининг шарқий ҳудудлари табиий офатлардан айниқса жиддий зарар кўрган.

 

NOAA маълумотларига кўра, июль ойида рекорд даражадаги иссиқ, кучли ёғингарчилик ва вайронкор бўронлар бир вақтда кузатилган. Минтақанинг катта қисмини қамраб олган “иссиқлик гумбази” эса юқори ҳарорат ва намликнинг хавфли уйғунлигини юзага келтирган.