Ливан ўлим жазосини бекор қилди

Ливан парламенти ўлим жазосини бекор қилиш тўғрисидаги қонун лойиҳасини маъқуллади. Шу тариқа Ливан араб давлатлари орасида ўлим жазосини расман бекор қилган биринчи мамлакатга айланди. Бу ҳақда ABC News хабар берди.

 

Қонунга кўра, ўлим жазоси ўрнига оғир меҳнат билан бирга умрбод озодликдан маҳрум қилиш жазоси қўлланади.

 

Овоз беришда 128 депутатдан иборат парламент аъзоларининг аксарияти қонун лойиҳасини қўллаб-қувватлаган. Ҳизбуллоҳнинг парламентдаги блоки эса ҳужжатга қарши овоз берган.

 

Қонун лойиҳаси дастлаб 2025 йил октябрь ойида парламентга киритилган бўлиб, турли сиёсий блоклардан етти нафар депутат томонидан қўллаб-қувватланган. Ҳужжат парламент муҳокамалари давомида ўзгартиришлар киритилгач, якуний шаклда маъқулланган.

 

Ливанда 2004 йилдан буён қатл этишга норасмий мораторий амал қилиб келган. Бироқ ўлим жазоси қонунчиликда сақланиб қолган ва судлар томонидан бундай ҳукмлар чиқарилиши давом этган.

 

Ливаннинг Адлия вазири Адел Нассар парламент қарорини мамлакат учун “тарихий қадам” деб баҳолаган.

 

Шу билан бирга, айрим депутатлар ўлим жазоси ўрнига жорий этиладиган умрбод қамоқ жазосининг айрим амалий жиҳатлари ҳали аниқлаштирилиши лозимлигини билдирган.

 

Ўлим жазосини бекор қилиш ҳақидаги овоз бериш парламентда баҳсли амнистия қонуни муҳокама қилинаётган бир пайтда ўтказилган. Мазкур қонун айрим маҳкумларнинг жазоларини енгиллаштириш ёки озод этиш имкониятини назарда тутади.