“Одам ташияпсанми? Пулини оляпсанми?” —Сурхондарё ҳокими транспортдаги муаммоларни танқид қилди

 

Сурхондарё вилояти ҳокими Улуғбек Қосимов вилоят аҳолисига транспорт хизматларини кўрсатишдаги муаммоларни танқид қилиб, темир йўл, авиақатнов ва шаҳарлараро транспорт тизимидаги камчиликларни бартараф этиш бўйича масъулларга топшириқлар берди.

 

Ҳоким, хусусан, Сурхондарёни Тошкент билан боғловчи автомобиль йўллари, темир йўл қатновлари ва вагонлардаги шароитлар билан боғлиқ муаммоларга эътибор қаратди.

 

Унинг таъкидлашича, айрим поездларда совутиш тизимлари ва бошқа зарур шароитлар етарли эмас. Шунингдек, чипталар тақчиллиги ҳамда вокзаллардаги хизмат кўрсатиш сифати бўйича аҳолининг эътирозлари мавжуд.

 

“Вагонга минган одам Тошкентга боргунча касал бўлиб қоляпти. На совутиш тизими ишлайди, на шароит бор. На билет бор, на вокзалда шароит бор”, — деди Улуғбек Қосимов.

 

Ҳоким авиақатновлар нархининг ошгани ва чипталарни харид қилишдаги қийинчиликларни ҳам танқид қилди. У авиачипталар нархини таҳлил қилиш, уларнинг сотилиш жараёнини шаффофлаштириш ва аҳолига қулайлик яратиш зарурлигини таъкидлади.

 

Шунингдек, Сариосиё йўналишидаги шаҳар атрофи поездлари ва Тошкентга қатновчи поездларни қисқа муддатда тўлиқ кўрикдан ўтказиш, йўловчилар учун зарур шароитларни яратиш ва хизматлар сифатини яхшилаш бўйича топшириқ берилди.

 

Ҳоким вокзал ва аэропортларда йўловчиларга хизмат кўрсатиш шароитларини, жумладан, санитария ҳолати, кутиш заллари ва бошқа инфратузилма объектларини ҳам танқидий ўрганиш лозимлигини қайд этди.

 

Шунингдек, чипталар савдосида шаффофликни таъминлаш, онлайн сотувларни такомиллаштириш ва таниш-билишчилик ҳолатларига йўл қўймаслик зарурлиги таъкидланди.

 

Улуғбек Қосимов масъулларга бир ҳафта муддатда аниқланган камчиликларни бартараф этиш бўйича топшириқлар берди. У келаси ҳафта вокзалга бориб, Тошкент йўналишидаги поездлар ва Сариосиё йўналишидаги шаҳар атрофи поездларидаги шароитларни шахсан кўздан кечиришини маълум қилди.