Шарбат қутисига яширилган 3,15 кг наркотик моддалар топилди
Гиёҳвандлик воситалари 20 та ўрамда болалар шарбат қутиси ичига яширилган.
«Тошкент-АЭРО» ихтисослаштирилган божхона комплекси ходимлари томонидан гиёҳвандлик воситаларининг ноқонуний айланишига қарши навбатдаги тезкор-қидирув тадбири ўтказилди. Бу ҳақда Божхона қўмитаси матбуот хизмати хабар берди.
3 август куни Тошкент шаҳрида ўтказилган тадбир давомида кузатувга олинган фуқаро бошқарувидаги автомобиль тўхтатилиб, холислар иштирокида кўздан кечирилган. Текширув вақтида автомобиль салонидаги болалар шарбат қутиси ичидан 20 ўрамда, умумий оғирлиги қарийб 11 грамм бўлган гиёҳвандлик воситалари аниқланган.
Ҳолат бўйича тезкор тадбир давом эттирилиб, божхона органлари томонидан Давлат хавфсизлик хизмати ва ички ишлар органлари вакиллари билан ҳамкорликда фуқаронинг яшаш хонадони ҳам холислар иштирокида кўздан кечирилган.
Натижада хонадонда героин, мефедрон, марихуана ва бошқа турдаги анъанавий ҳамда синтетик гиёҳвандлик воситалари борлиги аниқланган. Уларнинг умумий оғирлиги 3 килограмм 150 граммни ташкил этган.
Тезкор-қидирув тадбирларининг кейинги босқичида мазкур гиёҳвандлик воситаларининг асл эгаси бўлган Ўзбекистон фуқароси ҳам қўлга олинган.
Мазкур ҳолат юзасидан божхона органлари томонидан жиноят иши қўзғатилган. Ҳозирда терговга қадар ва тергов ҳаракатлари давом эттирилмоқда.
