ЮНEСКО Афғонистон таълим тизимидаги инқироз чуқурлашишидан огоҳлантирди
Толибоннинг аёллар ва қизларнинг таълим олишига қўйган чекловлари мамлакатдаги малакали аёл ўқитувчилар танқислигини кучайтириб, таълим тизимига узоқ муддатли зарар етказиши мумкин.
ЮНEСКО маълумотларига кўра, Толибон 2021 йилда ҳокимиятга қайтганидан бери 2,4 миллионга яқин афғон қизи ўрта таълимдан четлаштирилган. Афғонистон ҳозирда қизлар ва аёлларнинг ўрта ҳамда олий таълим олишини расман тақиқлаган дунёдаги ягона давлат бўлиб қолмоқда.
Қизларнинг таълим олишига қўйилган чекловлар мамлакатдаги ўқитувчилар етишмовчилигини ҳам кучайтирмоқда. ЮНEСКО ҳисоб-китобларига кўра, 2030 йилга бориб Афғонистонда 11 мингдан ортиқ малакали аёл ўқитувчи етишмаслиги мумкин. Бу эса, айниқса, бошланғич таълим сифатига салбий таъсир кўрсатиши кутилмоқда.
Ташкилот маълумотларига кўра, Афғонистонда 2 миллиондан ортиқ бошланғич мактаб ёшидаги бола қизлар таълимига қўйилган тақиқдан бошқа сабаблар туфайли ҳам мактабга бормаяпти. Мамлакатдаги таълим сифати билан боғлиқ муаммолар янада кенгайиб, 10 ёшли болаларнинг қарийб 90 фоизи оддий матнни ўқиб тушуна олмайдиган даражага етган.
ЮНEСКО чекловларнинг иқтисодий оқибатларига ҳам эътибор қаратган. Ташкилот ҳисоб-китобига кўра, аёлларнинг таълим олиши ва меҳнат бозорида иштирок этишидаги чекловлар 2066 йилгача 600 мингга яқин аёлнинг ишчи кучидан чиқиб кетишига олиб келиши мумкин. Натижада мамлакат иқтисодиёти 9,6 миллиард доллар миқдоридаги даромаддан маҳрум бўлиши эҳтимоли бор.
