“Ўзбекистон қўлёзма меросида тарихий шахслар” китоб-альбомининг янги нашри чоп этилмоқда

 

Ўзбекистоннинг бой қўлёзма меросини асраш, ўрганиш ва халқаро жамоатчиликка кенг тарғиб этишга қаратилган навбатдаги йирик илмий-маданий лойиҳа амалга оширилмоқда.

 

Айни пайтда “Ўзбекистон қўлёзма меросида тарихий шахслар” китоб-альбомининг янгиланган ва тўлдирилган нашрини чоп этиш ишлари Истанбул шаҳридаги “Mega Basım” нашриётида бошланди. Нашр Ўзбекистондаги Ислом цивилизацияси маркази директори Фирдавс Абдухолиқов иштирокида тайёрланмоқда.

 

Беш йиллик илмий изланишлар натижасида яратилган китоб-альбом XIII–XVIII асрларга оид ноёб Шарқ миниатюраларини жамлаган. Унда Амир Темур, Мирзо Улуғбек, Алишер Навоий, Заҳириддин Муҳаммад Бобур, Ҳусайн Бойқаро, Ибн Сино каби буюк аждодларимиз, шунингдек, бошқа тарихий шахсларнинг қўлёзмаларда акс этган қиёфалари ўрин олган.

 

Лойиҳа доирасида 45 дан ортиқ мамлакатдаги 200 дан зиёд музей, кутубхона ва илмий-тадқиқот муассасалари билан ҳамкорлик ўрнатилиб, 50 дан ортиқ илмий сафар амалга оширилган. Натижада XIII–XVIII асрларга оид 185 та миниатюра аниқланиб, илмий жиҳатдан ўрганилган.

 

Тадқиқотлар давомида Вашингтондаги Фрир галереяси, Нью-Йоркдаги Метрополитен музейи, Британия кутубхонаси, Франция Миллий кутубхонаси, Кембриж университети кутубхонаси, Тўпқопи саройи кутубхонаси каби нуфузли муассасаларда сақланаётган манбалар ҳам ўрганилди.

 

Янги нашр аввалги китоб-альбом асосида қайта кўриб чиқилиб, экспертларнинг таклифлари ҳамда янги илмий маълумотлар билан бойитилди. Шунингдек, хорижий музей ва кутубхоналарда сақланаётган 20 дан ортиқ янги тарихий шахслар тасвири нашрга киритилди.

 

Китоб-альбом ўзбек, рус ва инглиз тилларида тайёрланмоқда. Нашр Ўзбекистоннинг қўлёзма мероси ва Шарқ миниатюра санъатининг ноёб намуналарини халқаро илмий ва маданий жамоатчиликка кенгроқ тақдим этишга хизмат қилади.