Жиддий камчиликларга йўл қўйган 6 нафар ИИБ бошлиғи лавозимидан озод этилади
Яна 7 нафар раҳбарга интизомий жазо қўлланади.
Ички ишлар вазирлигида 11 август куни мамлакатдаги криминоген вазият, жиноятларнинг олдини олиш ва уларга қарши курашиш самарадорлигига бағишланган навбатдаги ҳайъат йиғилиши ўтказилди.
Йиғилишда 2026 йилнинг биринчи ярмида айрим ҳудудларда жиноятчиликнинг олдини олиш ва криминоген вазиятни барқарорлаштириш борасида йўл қўйилган камчиликлар танқидий муҳокама қилинди.
Ҳайъат қарорига кўра, жиддий камчиликларга йўл қўйган 6 нафар шаҳар ва туман ИИБ бошлиғини, жамоат хавфсизлигини таъминлаш йўналишидаги 2 нафар ўринбосарни ҳамда 2 нафар вилоят ИИБ масъул раҳбарини лавозимидан озод этиш белгиланди.
Шунингдек, 7 нафар раҳбарга нисбатан қатъий интизомий жазо чораси қўллаш, яна 3 нафар раҳбарнинг лавозимида қолиши ёки қолмаслиги масаласини кўриб чиқиш бўйича қарор қабул қилинди.
Шу билан бирга, жиноятларнинг олдини олиш ва уларни аниқлашда юқори натижаларга эришган ҳудудлар ҳам қайд этилди. Рейтинг натижаларига кўра, Тошкент вилояти биринчи, Самарқанд вилояти иккинчи, Фарғона вилояти учинчи ўринни эгаллади.
Бундан ташқари, Кармана, Жарқўрғон, Қува, Юнусобод, Наманган, Жондор, Пискент ва Янгиобод туманлари ИИБ раҳбарларини белгиланган тартибда рағбатлантириш бўйича таклифлар киритилди.
