Андижонда қизларни Туркияга фоҳишаликка олиб кетишга уринган аёллар ушланди
Улар қизларни юқори маошли иш таклифи билан алдаб, Туркияга олиб кетмоқчи бўлган.
Андижон вилоятида икки нафар аёл хорижда юқори маошли иш ваъдаси билан икки қизни алдаб, уларни Туркияга фоҳишалик билан шуғулланишга олиб кетишга урингани фош этилди. Бу ҳақда Ички ишлар вазирлиги хабар берди.
Маълум қилинишича, Андижон вилояти ИИБ Тезкор-қидирув хизмати ходимлари томонидан ўтказилган тезкор тадбир давомида 1998 ва 1995 йилларда туғилган икки нафар аёл 2002 ва 1994 йилларда туғилган икки қизни алдов йўли билан ўзларига жалб қилгани аниқланган.
Гумондорлар қизларни йўл ҳақи ва бошқа моддий харажатларни кейинчалик ишлаб бериш шарти билан Туркияга олиб бориб, уларни фоҳишалик билан шуғуллантиришни режалаштирган.
Қайд этилишича, улар Тошкент халқаро аэропорти орқали Туркияга чиқиб кетишни режалаштирган. Бироқ тезкор тадбир натижасида икки нафар аёл Андижон вилоятининг Шаҳрихон тумани ҳудудида қўлга олинган.
Мазкур ҳолат юзасидан Жиноят кодексининг 135-моддаси 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
