АҚШ ва Эрон ўртасидаги 60 кунлик сулҳ узайтирилади
якуний муддат ҳозирча аниқлаштирилмоқда.
АҚШ ва Эрон томонлари Покистон воситачилигида тузилган келишув доирасида амалдаги сулҳ муддатини узайтиришга келишиб олди. Бу ҳақда Туркиянинг Anadolu агентлиги Покистон ҳукумати манбаларига таяниб хабар берди.
Манбаларга кўра, ҳар икки томон сулҳни узайтиришга воситачилар орқали розилик билдирган. Айни пайтда келишувнинг янги муддати бўйича томонлар ўртасида хабар алмашинуви давом этмоқда.
Аввалроқ АҚШ ва Эрон ўртасида ҳарбий ҳаракатларни тўхтатиш ҳамда низони дипломатик йўл билан ҳал этиш мақсадида 60 кунлик вақтинчалик сулҳ бўйича ўзаро англашув меморандуми имзоланган эди. Мазкур келишувнинг амал қилиш муддати 17 август куни якунланиши кўзда тутилган.
Бироқ сулҳ даврида ҳам томонлар бир-бирини келишув шартларини бузишда айблаб келган. АҚШ Эронни Ҳормуз бўғозидаги вазиятни кескинлаштиришда айблаган бўлса, Теҳрон Вашингтонни ҳарбий ҳаракатларни давом эттиришда айблаган.
Айни пайтда сулҳни узайтириш бўйича якуний муддат ва келишувнинг кейинги шартлари аниқлаштирилмоқда.
