Қашқадарёда 856 нафар талабанинг контракти тўлаб берилади
Ушбу мақсад учун жами 3,78 миллиард сўм маблағ ажратилди.
Қашқадарё вилоятида эҳтиёжманд оилалар фарзандларининг олий таълим олишини қўллаб-қувватлаш мақсадида 856 нафар талабанинг контракт тўловларини қоплаш учун маблағ ажратилди. Бу ҳақда вилоят ҳокимлиги матбуот хизмати хабар берди.
Мазкур ташаббус ёшларнинг сифатли таълим олиши учун имкониятларни кенгайтириш, ижтимоий ҳимояга муҳтож оилалар фарзандларини қўллаб-қувватлаш ҳамда уларнинг таълим олишдаги молиявий қийинчиликларини камайтиришга қаратилган.
Қайд этилишича, Қашқадарё вилояти ҳокими Муротжон Азимов томонидан эҳтиёжманд оилалар фарзандларининг олий таълим олишини қўллаб-қувватлашга қаратилган тегишли қарор қабул қилинган.
Унга кўра, вилоятдаги 856 нафар талаба-ёшнинг контракт тўловлари учун жами 3 миллиард 780 миллион 600 минг сўм ажратилган.
Амалий ёрдам, айниқса, оилавий шароити сабаб контракт тўловини амалга оширишда қийинчиликка дуч келаётган ёшларнинг ўқишини давом эттиришига кўмаклашади. Шунингдек, ташаббус хотин-қизларнинг олий таълим олиш имкониятларини кенгайтириш ва ёшларнинг келажакка бўлган ишончини мустаҳкамлашга хизмат қилади.
