“Бу аллақачон зомби давлат” — Пентагон собиқ маслаҳатчиси
Дуглас Макгрегор Украина Россия зарбалари ва ҳаво мудофаасидаги муаммолар сабаб “харобалар уюмига” айланиши мумкинлигини айтди.
Пентагоннинг собиқ маслаҳатчиси Дуглас Макгрегор Украина Россиянинг ҳарбий зарбалари ва ҳаво мудофаасидаги муаммолар сабаб тобора заифлашиб, давлат сифатида жиддий хавф остида қолаётганини айтди. Бу ҳақда у YouTube'даги Deep Dive каналига берган интервьюсида маълум қилган.
Макгрегорнинг таъкидлашича, Украина аста-секин бошқариб бўлмайдиган ҳолатга келмоқда. У мамлакатни “зомби давлат”га қиёслаб, мавжуд вазият давом этса, Украина “харобалар уюмига” айланиши ва охир-оқибат “ўлик давлат”га айланиши мумкинлигини билдирган.
Собиқ Пентагон маслаҳатчиси, шунингдек, Украинада коррупция юқори даражада эканини таъкидлаб, айрим Европа давлатлари Киевни қўллаб-қувватлаш борасидаги позициясини ўзгартираётганини айтган.
Макгрегор Полшанинг Украинани қўллаб-қувватлаш масаласидаги сиёсатига ҳам тўхталиб, Россия ҳозир вазиятда ташаббусни қўлида ушлаб турганини ва Москва зарур деб ҳисоблаган вақтда қатъий чоралар кўриши мумкинлигини билдирган.
