"Маданиятчилар нима қилса ҳамма эргашадику, дарахт экишни мода қилишсин" — Расул Кушербоев
Кушербоев дарахт экишни туғилган кун ва фарзандли бўлиш каби муҳим саналар билан боғлаб, уни яхши анъанага айлантиришни таклиф қилди.
Қашқадарё вилояти Шаҳрисабз туманидаги «Лочин» болалар оромгоҳида ўтказилаётган “Ёшлар — келажак бунёдкорлари” В халқаро экология қурултойи доирасида дарахт экиш ва яшил ҳудудларни кўпайтириш масалаларига эътибор қаратилди.
Қурултойда сўзга чиққан экология ва атроф-муҳит масалалари бўйича мутахассис Расул Кушербоев дарахт экишни нафақат экологик ташаббус, балки жамиятда анъанага айлантириш зарурлигини таъкидлади. Бу ҳақда “Zamon.uz” мухбири хабар берди.
У ўз тажрибасидан мисол келтириб, ҳар бир туғилган кунни дарахт экиш билан боғлаш мумкинлигини айтди. Кушербоевнинг таъкидлашича, инсон ёши улғайгани сари ўзи эккан дарахтлар сонини ҳам кўпайтириб бориши, уларни парвариш қилишга масъулият билан ёндашиши мумкин.
Шунингдек, у фарзанд туғилиши, туғилган кун ёки бошқа муҳим саналарни нишонлаш жараёнида дарахт экишни одатга айлантиришни таклиф қилди.
“Бир инсон туғилганда унга атаб битта дарахт экиб, унинг ёнига ъшунинг туғилганлиги шарафига экилганʼ деган ёзув қўйилса. Узоқ умр кўрадиган дарахт экилса, бола 10–20 ёшга етганда у катта дарахтга айланган бўлади. Ҳар кимнинг ўз дарахти бўлади”, — деди Расул Кушербоев.
Унинг фикрича, бундай экологик ташаббусларни оммалаштиришда маданият вакилларининг ўрни алоҳида. Чунки жамиятда янги одат ва анъаналарнинг шаклланишида санъаткорлар ва бошқа жамоатчиликка таъсири юқори бўлган шахслар муҳим роль ўйнайди.
Расул Кушербоев маданият вакиллари дарахт экишни ўзлари намуна сифатида бошлаб, уни кенг тарғиб қилса, бу ташаббусни жамиятда мода ва яхши анъанага айлантириш мумкинлигини таъкидлади.
