Италияда ўқ-дори заводида кучли портлаш содир бўлди
Портлашдан олдин корхона ҳудудида ёнғин чиққан ва воқеа жойига ўт ўчирувчилар ҳамда полиция ходимлари етиб борган, жабрланганлар йўқ.
13 август куни Рим шаҳрининг жануби-шарқида жойлашган Коллеферро шаҳридаги ўқ-дори заводида кучли портлаш юз берди. Портлашдан олдин корхона ҳудудида ёнғин чиққан ва воқеа жойига ўт ўчирувчилар ҳамда полиция ходимлари етиб борган. Улар ёнғинни бартараф этиш ишларини олиб бораётган пайтда кучли портлаш содир бўлган.
Воқеа KNDS Ammo Italy компаниясига қарашли, аввал “Simmel Difesa” номи билан фаолият юритган завод ҳудудида қайд этилган. Корхона ўрта ва катта калибрли ўқ-дорилар, шунингдек аэрокосмик тизимлар учун қаттиқ ёнилғи ишлаб чиқаради.
Дастлабки маълумотларга кўра, портлаш заводнинг “порохларни пресслаш” бўлимида юз берган бўлиши мумкин. Италия оммавий ахборот воситалари портлашдан кейин осмонга катта қора тутун кўтарилганини хабар қилган. Кучли портлаш овози Коллеферро атрофидаги ҳудудларда ҳам эшитилган.
Воқеа вақтида завод ҳудудида ёнғинни ўчириш учун бир нечта ёнғин-қутқарув экипажлари ва полиция кучлари ишлаган. AP маълумотига кўра, ёнғин яқин атрофга ҳам тарқалган ва ҳудудни назорат қилиш учун вертолёт жалб қилинган.
Коллеферро мэри Жулио Каламитанинг билдиришича, вазият назорат остига олинган. Унинг таъкидлашича, портлаш завод ёпиқ бўлган ёзги таътил даврида содир бўлган. Мэрнинг сўзларига кўра, корхона одатдагидек ишлаётганида бу воқеа анча оғир оқибатларга олиб келиши мумкин эди.
Дастлабки маълумотларга кўра, портлаш оқибатида жабрланганлар ва ҳалок бўлганлар ҳақида хабар берилмаган. Маҳаллий манбалар заводда бўлган ишчиларнинг барчаси хавфсиз жойга чиққанини маълум қилган. AP маълумотига кўра, заводда бўлган 24 нафар ишчининг барчаси ҳисобга олинган.
Ҳозирча портлашнинг аниқ сабаби маълум эмас. Ҳуқуқни муҳофаза қилувчи органлар ва прокуратура воқеа сабабларини аниқлаш бўйича текширув бошлаган.
