Навоийда 340 млн сўмлик олтин савдосига чек қўйилди
212,9 грамм олтинни сотмоқчи бўлган шахслар харидордан 20 минг АҚШ доллари ва 100 млн сўм олаётганида қўлга олинди.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари ҳамкорлигида Навоий шаҳрида тезкор тадбир давомида Бухоро вилоятининг Шофиркон туманида яшовчи, 1987 ва 1993 йилларда туғилган икки нафар фуқаро томонидан ноқонуний олтин савдоси амалга оширилаётгани аниқланди. Бу ҳақда ДХХ хабар берди.
Маълум бўлишича, шахслар умумий 212,9 грамм қуйма олтинни харидорга 340 миллион сўмга сотишга келишган. Улар харидорга 999 пробали 26,3 грамм олтинни топшириб, қолган қисмини кейинчалик етказиб беришни ваъда қилган.
Шунингдек, олтин учун харидордан 20 минг АҚШ доллари ва 100 миллион сўмни олган вақтида икки нафар шахс ашёвий далиллар билан ушланган.
Тезкор тадбир давомида улардан бирининг яшаш хонадонида қумдан олтинни ажратиб олишга мўлжалланган яширин цех ташкил этилгани ҳам аниқланган.
Мазкур ҳолат юзасидан фуқароларга нисбатан Жиноят кодексининг 177-моддаси 4-қисми «а» банди билан жиноят иши қўзғатилиб, тергов ҳаракатлари олиб борилмоқда.
