Путин илк бор Курил оролларига ташриф буюрди — Япония эътироз билдирди
Япония ТИВ Итуруп ва бошқа жанубий Курил оролларини ўз ҳудуди деб ҳисоблашини таъкидлаган.
Россия президенти Владимир Путин Курил оролларининг Итуруп оролига ташриф буюрди. Бу Россия давлат раҳбарининг Курил оролларига илк ташрифи бўлди. Бу ҳақда Риа Новости хабар берди.
Путиннинг ташрифи ортидан Япония Россияга “қатъий норозилик” билдирди. Япония Ташқи ишлар вазирлиги Токио Курил оролларининг жанубий қисмини, жумладан Итурупни, “Шимолий ҳудудлар” деб аташи ва уларни Япония ҳудуди деб ҳисоблаши ҳақида баёнот берди.
Япония томонининг таъкидлашича, ушбу ҳудудлар тарихий ва ҳуқуқий нуқтаи назардан Японияга тегишли. Шу сабабли Токио Россия президентининг Итурупга ташрифини қабул қилиб бўлмайдиган ҳаракат сифатида баҳолаган.
Курил оролларининг жанубий қисми устидан ҳудудий даъво Россия ва Япония ўртасидаги узоқ йиллик низолардан бири бўлиб қолмоқда. Иккинчи жаҳон урушидан кейин архипелаг Совет Иттифоқи назоратига ўтган. Япония эса Итуруп, Кунашир, Шикотан ва Ҳабомаи ороллари бўйича ўз даъвосини сақлаб келмоқда.
Москва эса ушбу ҳудудлар устидан Россиянинг суверенитети халқаро ҳуқуқ асосида расмийлаштирилганини ва у шубҳасиз эканини таъкидлаб келади.
