Россия Украинада 16 мингдан ортиқ тинч аҳолини ҳибсда ушлаб турибди – БМТ
БМТ Россия томонидан ҳибсга олинган украиналик фуқароларнинг катта қисми қийноқлар ва шафқатсиз муомалага дуч келаётганини маълум қилди.
Бирлашган Миллатлар Ташкилоти маълумотларига кўра, Россия томонидан уруш давомида ҳибсга олинган 16 мингдан ортиқ украиналик тинч аҳоли ҳанузгача озодликдан маҳрум этилган. БМТ уларнинг кўпчилиги қариндошлари билан алоқага чиқиш ёки ҳуқуқий ҳимоядан фойдаланиш имкониятидан маҳрум қилинганини билдирди.
БМТнинг инсон ҳуқуқлари бўйича вакиллари Россия томонидан ҳибсда сақланаётган украиналик фуқаролар ва ҳарбий асирлар билан боғлиқ ҳолатларни ўрганган. Уларнинг маълумотларига кўра, суҳбатлашилган украиналик ҳарбий асирларнинг 95 фоиздан ортиғи, шунингдек, фуқаролик маҳбусларининг 85 фоизи қийноқлар ёки бошқа турдаги шафқатсиз муомалага дуч келганини билдирган.
БМТ, шунингдек, Украина ҳарбий асирлари орасида 129 кишининг қатл этилгани ва Россия ҳибсхоналари ёки қамоқхоналарида қийноқлар ҳамда оғир шароитлар оқибатида 48 киши ҳалок бўлгани ҳақида маълумот тўплаган.
БМТ Хавфсизлик кенгаши йиғилишида Россия томонидан ҳибсга олинган украиналикларнинг айримлари ўз бошидан кечирганларини сўзлаб берди. Украиналик ҳарбий асир Хуан Лейва Гарция қарийб уч ярим йил давомида асирликда бўлганини ва калтаклаш ҳамда электр токи билан қийноққа солинганини айтди. Қрим-татар фаоли Ление Умерова эса отасини кўриш учун Қримга боришга уринганидан кейин ҳибсга олинганини маълум қилди.
Шу билан бирга, БМТ Россия ҳарбий асирлари билан боғлиқ ҳолатларни ҳам қайд этган. Ташкилот билан суҳбатлашган россиялик ҳарбий асирларнинг қарийб ярми асирга олинган дастлабки даврда Украина кучлари томонидан ёмон муомалага дуч келганини билдирган. Бироқ улар Украина қамоқхоналарига жойлаштирилгач, муомала яхшилангани қайд этилган.
Россия эса БМТнинг айбловларини рад этиб, уларни Украина ва НАТО давлатларининг пропагандаси деб атаган.
