Россияда мигрантлар учун даромад солиғини ошириш таклиф қилинди
Шунингдек, солиқ тўламаган хорижликларни депортация қилиш таклифи ҳам илгари сурилди.
Россия Давлат Думаси Хавфсизлик қўмитаси раисининг биринчи ўринбосари Андрей Луговой хорижий фуқаролар учун даромад солиғи ставкасини 30 фоизгача оширишни таклиф қилди. Бу ҳақда ТАСС хабар берди.
Депутатнинг таъкидлашича, хорижий ишчилар Россиянинг инфратузилмаси ва тиббий хизматларидан фойдаланади. Шу сабабли, унинг фикрича, улар томонидан тўланадиган солиқлар миқдорини ошириш масаласини кўриб чиқиш лозим.
Луговой, шунингдек, солиқ тўлашдан бўйин товлаган мигрантларни Россиядан депортация қилиш чораларини қўллаб-қувватлади. У бундай ҳолатларда солиқ қарзларини бўлиб-бўлиб тўлаш имкониятини бермасликни таклиф қилган.
Депутат яна мигрантлар ёки уларнинг иш берувчиларидан аванс ҳисобварағига маблағ киритишни жорий этиш ташаббусини илгари сурган. Ушбу маблағлар депортация, вақтинчалик жойлаштириш, суд харажатлари ва жарималарни қоплаш учун ишлатилиши мумкин.
Луговойнинг таъкидлашича, Россиянинг миграция сиёсати, аввало, мамлакат манфаатларини ҳисобга олиши керак.
