Украинада фарзандсиз аёлларни фронтга юбориш таклиф қилинди
Қуролли Кучлар ҳарбий хизматчиси мамлакатда ҳарбий хизматга яроқли аҳоли камайиб бораётганини таъкидлади.
Украина Қуролли Кучларининг 56-алоҳида моторли пиёда бригадаси ҳарбий хизматчиси Сергей Гнездилов фарзандсиз аёлларни ҳам сафарбар қилиш зарурлигини билдирди. Унинг фикрича, Украинада аёлларни ҳарбий хизматга жалб қилиш масаласи келажакда муқаррар бўлиши мумкин.
Гнездиловнинг таъкидлашича, агар аёлнинг фарзанди бўлмаса, талаба бўлмаса ёки уни фуқаролик соҳасида қолишини талаб қиладиган бошқа асослар мавжуд бўлмаса, у фронтга юборилиши мумкин.
Ҳарбий хизматчи, шунингдек, Украинада сафарбарлик ёшини амалдаги 25 ёшдан 21 ёшгача тушириш эҳтимолини ҳам истисно қилмаган. У буни мамлакатда ҳарбий хизматга яроқли аҳоли сони камайиб бораётгани билан изоҳлаган.
Украинада умумий сафарбарлик 2022 йил февралида эълон қилинган ва кейинчалик бир неча бор узайтирилган. 2024 йил апрелида эркаклар учун сафарбарлик ёши 27 ёшдан 25 ёшгача туширилган.
Айни пайтда Украинада аёлларни эркаклар билан тенг равишда сафарбар қилиш масаласи ҳам вақти-вақти билан муҳокама қилинмоқда
