Ўзбекистонда “Бозор назорати тўғрисида”ги қонун маъқулланди

 

Олий Мажлис Сенатининг 18-ялпи мажлисида “Бозор назорати тўғрисида”ги қонун муҳокама қилиниб, сенаторлар томонидан маъқулланди.

 

Янги қонун Ўзбекистонда техник жиҳатдан тартибга солиш тизимини такомиллаштириш, ноозиқ-овқат маҳсулотлари хавфсизлигини таъминлаш ҳамда истеъмолчилар ҳуқуқларини янада самарали ҳимоя қилишга қаратилган.

 

Қонун Жаҳон савдо ташкилотининг Савдодаги техник тўсиқлар тўғрисидаги битими ва халқаро илғор тажриба талабларига мувофиқ ишлаб чиқилган.

 

Хавфга асосланган бозор назорати жорий этилади

Янги тартиб билан хавфларни баҳолашга асосланган бозор назорати механизми жорий этилади. Бу орқали бозорда инсон ҳаёти ва соғлиғига, атроф-муҳитга ёки бошқа манфаатларга зарар етказиши мумкин бўлган маҳсулотларни тезкор аниқлаш ва муомаладан чиқариш имконияти кенгайтирилади.

 

Сенатнинг Бюджет ва иқтисодий масалалар қўмитаси раиси Эркин Гадоевнинг таъкидлашича, янги тизим тадбиркорларни оммавий назорат қилиш ёки жазолашга эмас, балки мониторинг ва юқори хавфга эга маҳсулотларни аниқлашга қаратилади.

 

Техник талабларга жавоб бермайдиган маҳсулот аниқланган тақдирда уни муомаладан чиқариш, қайтариб олиш ёки ундан фойдаланишни чеклаш каби чоралар қўлланади.

 

Божхона назорати ҳам кучайтирилади

Қонунга кўра, божхона органлари хавфларни бошқариш тизими натижаларига асосан маҳсулотнинг мажбурий талабларга мос келмаслиги учун етарли асослар мавжуд бўлса, унинг эркин муомалага чиқарилишини вақтинча тўхтатиб туриши мумкин.

 

Шунингдек, бозор назорати органлари, уларнинг мансабдор шахслари ҳамда тадбиркорлик субъектларининг ҳуқуқ ва мажбуриятлари, шунингдек, жавобгарлиги аниқ белгиланади.

 

Назорат тадбирларини қонун талабларига зид равишда амалга оширган ёки хизмат вазифаларини лозим даражада бажармаган мансабдор шахслар ҳам белгиланган тартибда жавобгарликка тортилади.

 

Қонунда бозор назорати доирасида инсон ҳаёти ва соғлиғига етказилган зарарни қоплаш механизмлари ҳам мустаҳкамланмоқда.

 

Сенатор Эркин Гадоевнинг қайд этишича, янги қонун ҳалол фаолият юритаётган тадбиркорларни контрафакт ва сифатсиз маҳсулотларни олиб кирувчи инсофсиз рақобатчилардан ҳимоя қилиш билан бирга, истеъмолчиларнинг хавфсиз маҳсулот харид қилиш ҳуқуқини кафолатлашга хизмат қилади.

 

Қонуннинг қабул қилиниши Ўзбекистоннинг Жаҳон савдо ташкилотига аъзо бўлиш жараёнида ҳам муҳим қадам сифатида баҳоланмоқда. Янги тизим савдодаги техник тўсиқларни камайтириш ва маҳаллий маҳсулотларнинг халқаро бозордаги рақобатбардошлигини оширишга хизмат қилиши кутилмоқда.