“Афғонистонга электр энергияси фақат ички талаб қондирилгандан кейин экспорт қилинади” — Энергетика вазири
Шерзод Хўжаев қуёш ва шамол электр станциялари юқори қувватда ишлаган пайтда ҳосил бўладиган ортиқча электр энергиясини экспорт қилиш орқали катта иқтисодий самарага эришиш мумкинлигини таъкидлади.
Ўзбекистонда электр энергиясини Афғонистонга экспорт қилиш мамлакат ичидаги талаб тўлиқ қондирилгандан кейин қоладиган ортиқча қувват ҳисобидан амалга оширилади. Бу ҳақда энергетика вазири Шерзод Хўжаев 13 август куни Президент Шавкат Мирзиёевга энергетика соҳаси бўйича тақдимотдан сўнг маълум қилди.
Вазирнинг таъкидлашича, қуёш ва шамол электр станциялари юқори қувватда ишлайдиган даврларда ортиқча электр энергияси ҳосил бўлиши мумкин. Ана шу ортиқча қувватни экспорт қилиш орқали иқтисодий самарадорликни ошириш режалаштирилмоқда.
“Афғонистонга экспорт қилинадиган электр энергияси ҳажми ички талаб тўлиқ қондирилганидан кейин қоладиган қисми ҳисобидан таъминланади”, — деди Шерзод Хўжаев.
Шунингдек, вазир Сурхондарё вилоятидаги қуёш электр станциялари фаолиятига тўхталди. Унинг қайд этишича, ҳудудда ҳозир ишлаб турган қуёш электр станцияси қуввати вилоятнинг мавжуд талабини тўлиқ қоплаш имконини беради.
Шу билан бирга, Сурхондарёда яна 2–3 та қуёш электр станциясини қуриш режалаштирилган. Янги қувватларнинг ишга туширилиши натижасида ҳудудда ишлаб чиқариладиган электр энергияси ҳажми ошиб, ички эҳтиёждан ортган қисмини экспорт қилиш имконияти кенгаяди.
