“Қамчини президент қилмоқчи эдим” — Садир Жапаров

 

Қирғизистон президенти Садир Жапаров Қамчибек Ташиевнинг 2027 йилги президентлик сайловларида номзодини илгари суришини истагани ҳақида маълум қилди. Бу ҳақда у журналист Али Токтакуновга берган интервьюсида айтган.

 

Жапаровнинг сўзларига кўра, у Ташиев билан 2005 йилдан бери таниш ва 2020 йилда ҳокимиятга келганидан сўнг уни Давлат миллий хавфсизлик қўмитаси раиси этиб тайинлаган. Президент Ташиев ушбу лавозимда беш йил давомида яхши фаолият юритганини қайд этган.

 

Жапаров Ташиевнинг асосий камчиликларидан бири сифатида унинг яқинлари, жумладан, қариндошлари ва танишлари фаолиятини етарлича назорат қилмаганини кўрсатган.

 

“Биз дўст бўлиб қоламиз, лекин уни давлат хизматига қайтариш режам йўқ. Ҳозир у дам олиши керак”, — деган Жапаров.

 

Президентнинг таъкидлашича, Ташиев лавозимидан четлатилганидан кейин ўз хатоларини тан олган ва яқинларига етарлича назорат ўрнатмаганини билдирган.

 

Жапаров, шунингдек, Ташиевни 2027 йилги президентлик сайловларида қўллаб-қувватлаш бўйича ўз режасини илгари сурганини маълум қилгаб. Унга кўра, Жапаров олти йил президентлик қилганидан сўнг, 2027 йилда қайта номзодини қўймаслик ва Ташиевни президентликка номзод сифатида илгари суришни режалаштирган.

 

“Ростини айтсам, сизга бутун ҳақиқатни айтаман. Менинг ўз режам бор эди: олти йил ишлаб, кейин 2027 йилда лавозимга номзодимни қўймаслик. Агар Қамчи ўша пайтгача тайёр бўлганида, тинимсиз меҳнат қилганида ва тажриба орттирганида, мен унинг номзодини қўйишини хоҳлардим. Мен номзодимни қўймасдим, Қамчини президент қилиб, нафақага чиқардим. Бу менинг ўз режам эди”, — деган Жапаров.

 

У Ташиевга бу режасини тахминан икки йил аввал айтганини ҳам билдирган. Бироқ кейинчалик Ташиев президентликка тайёр эмаслигини кўрганини таъкидлаган.

 

Жапаров Ташиевнинг лавозимидан озод этилиши парламент ва жамиятда тарафкашлик кучайиши ҳамда мамлакат аҳолисини бўлиниш хавфи билан боғлиқ бўлганини айтган.

 

Шунингдек, президент Ташиевнинг келгусида давлат хизматига қайтиши режалаштирилмаганини билдирган. Ташиевга нисбатан суд жараёнлари бўйича эса Жапаров суд қарорига аралашмаслигини ва апелляция натижасини кутиш кераклигини таъкидлаган.