Германияда жазирама оқибатида 12,5 мингга яқин киши вафот этди

 

Германияда 2026 йилда юқори ҳароратнинг саломатликка таъсири оқибатида тахминан 12,5 минг киши вафот этгани қайд этилди. Бу ҳақда Роберт Кох институти (РКИ) ҳисоботига таяниб, ТАСС хабар берди.

 

РКИ маълумотларига кўра, иссиқлик билан боғлиқ ўлимларнинг энг юқори кўрсаткичи Саарланд ва Рейнланд-Пфалтс федерал ерларида қайд этилган. Ушбу ҳудудларда ҳар 100 минг аҳолига мос равишда 43,4 ва 38,7 та ўлим тўғри келган. Германия бўйича ўртача кўрсаткич эса 100 минг аҳолига 15 та ўлимни ташкил этган.

 

Жазирама иссиқ, айниқса, кексалар учун хавфли бўлган. Ҳисоб-китобларга кўра, 85 ёш ва ундан катталар орасида қарийб 6,3 минг киши иссиқлик оқибатида вафот этган. Шунингдек, 75–84 ёшдаги 3,1 мингдан ортиқ, 65–74 ёшдаги қарийб 1,9 минг кишининг ўлими юқори ҳарорат билан боғланган.

 

РКИ ҳисоб-китобларига кўра, 22–28 июнь кунлари Германияда жазирама иссиқ сабабли тахминан 9,6 минг киши вафот этган. Ўша даврда мамлакатнинг айрим ҳудудларида ҳаво ҳарорати 40 даражага яқинлашган.

 

Таққослаш учун, РКИ маълумотларида 2018 йилда иссиқ билан боғлиқ 9,4 минг, 2019 йилда эса 7,7 минг ўлим қайд этилгани кўрсатилган. Шу билан бирга, 2026 йил бўйича якуний кўрсаткичлар кейинчалик қайта ҳисобланиши мумкин.

 

Институт ўз ҳисоб-китобларини Германия Федерал статистика бошқармасининг ўлим маълумотлари ҳамда Германия об-ҳаво хизмати маълумотлари асосида шакллантиради.

 

Жазирама иссиқ ортидан Германияда соғлиқни сақлаш ва парвариш муассасаларининг юқори ҳароратларга тайёргарлиги масаласи ҳам муҳокама қилинмоқда. Хусусан, касалхоналар, парвариш муассасалари ва болалар боғчаларини совутиш тизимлари билан жиҳозлашга инвестицияларни ошириш таклифлари илгари сурилган.