Қирғизистонда давлат тўнтаришига уриниш иши бўйича 70 киши сўроқ қилинади
Апелляция суд мажлиси 17 август куни бўлиб ўтади.
Қирғизистонда муддатидан олдин президентлик сайловларини ўтказишни талаб қилган 70 нафар сиёсатчи ва жамоат арбоби давлат тўнтаришига уриниш иши бўйича апелляция судида гувоҳ сифатида сўроқ қилинади. Бу ҳақда собиқ парламент спикери Нурланбек Турғунбек уулуни ҳимоя қилаётган адвокат Латйпбек Нуралимов маълум қилди.
2026 йил февраль ойида 75 нафар сиёсий ва жамоат арбоби конституциядаги ўзгаришлар сабаб муддатидан олдин президентлик сайловларини ўтказишни талаб қилган петицияни имзолаган. Кейинчалик улардан саккиз нафари, жумладан, петицияни имзолаган беш киши давлат тўнтаришига уринишда айбланган.
Ҳимоя томони қолган 70 нафар имзо чекувчига ҳам ҳуқуқий баҳо берилмаганини таъкидлаб, уларни судга чақиришни сўраган. Суд мазкур илтимосномани асосли деб топиб, уларнинг кейинги мажлисда иштирокини таъминлашга қарор қилган.
2 июль куни Бишкекнинг Первомайский туман суди Нурланбек Турғунбек уулу, Қамчибек Ташиев, собиқ бош прокурор Қурманкул Зулушев ва яна беш кишини ҳокимиятни эгаллаб олишга уринишда айбдор деб топиб, уларга уч йиллик синов муддати билан тўрт йил қамоқ жазоси тайинлаган эди. Томонлар суд қарори устидан апелляция шикоятларини берган.
