Миллатлар рақси — дўстлик ва ҳамжиҳатлик тимсоли

Қашқадарё вилоятининг Шаҳрисабз туманидаги “Лочин” болалар оромгоҳида ўтказилаётган “Ёшлар — келажак бунёдкорлари” V халқаро экология қурултойи доирасида иштирокчилар учун ўзига хос маданий дастур ташкил этилди. Тадбирнинг энг ёрқин ва унутилмас лаҳзаларидан бири — “Халқлар дўстлиги” дастури бўлди.

 

 

Мазкур дастурда иштирокчилар ўз миллий маданиятини эмас, балки бошқа халқларнинг миллий рақслари, мусиқаси ва анъаналарини ижро этиш орқали ўзига хос маданий алмашинувни намойиш этди. Бу эса тадбирга янада ўзгача руҳ ва мазмун бағишлади.

 

 

Хусусан, Тошкент вилояти жамоаси Ҳиндистон миллий рақсини ижро этиб, ҳинд халқининг ўзига хос рақс ҳаракатлари, мусиқаси ва миллий либосларини саҳнада намоён этди. Хорижий иштирокчилар ҳам ушбу ташаббусни катта қизиқиш билан кутиб олди.

 

 

Беларус Республикасидан ташриф буюрган ёшлар эса Туркманистон миллий маданиятини акс эттирувчи куй-қўшиқлар остида миллий либосларда рақс ижро этиб, икки халқ маданиятига бўлган ҳурматини намойиш этди.

 

Шунингдек, бошқа жамоалар томонидан ҳам турли мамлакатларнинг миллий рақслари ижро этилиб, дунёнинг турли халқларига хос санъат, урф-одат, мусиқа ва либослар бир саҳнада мужассамлаштирилди.

 

 

Аҳамиятлиси, мазкур тадбир оддий рақс намойиши бўлиб қолмай, турли миллат ва элатларни бирлаштирувчи маданий кўприк вазифасини бажарди. Бир давлат вакилларининг бошқа халқ маданиятини ўрганиб, уни саҳнада ижро этиши ўзаро ҳурмат, бағрикенглик ва дўстликнинг ёрқин ифодасига айланди.

 

 

Тадбир давомида иштирокчилар нафақат рақс ижро этди, балки бошқа халқларнинг маданияти, анъаналари ва санъатига бўлган қизиқишини ҳам намойиш қилди. Турли тилларда янграган мусиқа, ранг-баранг миллий либослар ва жўшқин рақслар оромгоҳ ҳудудида ҳақиқий халқаро дўстлик муҳитини яратди.

 

 

“Халқлар дўстлиги” дастури ёшлар ўртасидаги халқаро алоқаларни янада мустаҳкамлаш, турли халқлар маданиятига ҳурмат руҳини ошириш ҳамда ёш авлод қалбида бағрикенглик ва ҳамжиҳатлик қадриятларини шакллантиришга хизмат қилди.

 

 

Шу тариқа, “Ёшлар — келажак бунёдкорлари” V халқаро экология қурултойи нафақат экологик билим ва ташаббуслар, балки халқаро дўстлик, маданий алмашинув ва ўзаро ҳурмат байрамига ҳам айланмоқда.