Миср Макка шартномасига қўшилиши мумкин
Ташқи ишлар вазири масала ҳуқуқий ва техник жиҳатдан ҳам кўриб чиқилишини билдирди.
Миср Покистон, Саудия Арабистони ва Туркия томонидан имзоланган Макка мудофаа шартномасига қўшилиш имкониятларини ўрганмоқда. Бу ҳақда Миср ташқи ишлар вазири Бадр Абдул Ати маълум қилди.
Вазирнинг таъкидлашича, Қоҳира ушбу масалани ҳуқуқий ва техник жиҳатларини ҳам инобатга олган ҳолда ҳар томонлама кўриб чиқиши лозим.
«Бу масала бўйича фикрларимиз бор, бироқ аввало уни турли нуқтаи назардан, жумладан, ҳуқуқий ва техник жиҳатлардан кўриб чиқишимиз керак», — деган Бадр Абдул Ати.
Унинг қайд этишича, Миср мудофаа келишуви бўйича барча иштирокчи давлатлар билан яқин алоқада ва мунтазам мувофиқлаштиришни давом эттирмоқда.
Макка шартномаси 7 август куни Саудия Арабистони валиаҳд шаҳзодаси Муҳаммад бин Салмон, Туркия президенти Ражаб Тоййиб Эрдоған ва Покистон бош вазири Шаҳбоз Шариф томонидан имзоланган. Келишувга кўра, иштирокчи давлатлардан бирига қилинган қуролли ҳужум барча томонларга қарши тажовуз сифатида баҳоланади.
