Наманганда ИИО ходимига 3 минг доллар пора бераётган фуқаро ушланди

 

Наманган вилоятида ўзига нисбатан тўпланган ҳужжатларни тергов органларига юбормаслик ва банк томонидан блокланган маблағларни чиқариб бериш эвазига ички ишлар ходимига 3 минг АҚШ доллари миқдорида пора таклиф қилган фуқаро ушланди. Бу ҳақда Ички ишлар вазирлиги хабар берди.

 

Маълум қилинишича, Давлатобод туманида яшовчи фуқаронинг аризаси юзасидан терговга қадар текширув ўтказилган. Ўрганишлар давомида банк пластик картаси 2002 йилда туғилган фуқарога тегишли экани ҳамда ундаги маблағлар бошқа тадбиркорнинг банк картасига ўтказилгани аниқланган.

 

Шунингдек, МЧЖ раҳбарига тегишли iPhone 15 Pro Max ва Galaxy A34 5G русумли телефонлар кўздан кечирилган. Қурилмалардаги Mobcash иловасида бошқа шахс профилининг лимит ҳисобида 40 миллион 615 минг сўм, транзакциялар тарихида эса 4 миллиард 991 миллион сўм маблағ акс этгани аниқланган.

 

Мазкур ҳолатлар юзасидан тегишли ҳужжатлар расмийлаштирилганидан сўнг, фуқаро ўзига нисбатан тўпланган материалларни тергов органларига юбормаслик, қонуний чора кўрмаслик ҳамда банк томонидан блокланган маблағларни чиқариб бериш эвазига ИИО ходимига 3 минг доллар беришни таклиф қилган.

 

Бироқ ички ишлар ходими порани олишдан бош тортган. ИИВ Шахсий хавфсизлик бош бошқармаси ходимлари томонидан ўтказилган тезкор тадбир давомида фуқаро Наманган шаҳридаги Намангоний кўчасида майор Султоновга 3 минг АҚШ долларини пора тариқасида бераётган вақтида ашёвий далиллар билан ушланган.

 

Ҳолат юзасидан 1991 йилда туғилган шахсга нисбатан Жиноят кодексининг 211-моддаси 1-қисми билан жиноят иши қўзғатилган.

 

Ҳозирда тергов ҳаракатлари олиб борилмоқда.