Қозоғистонда 6254 та мактаб террористик таҳдидларга мойил деб топилди
Улар видеокузатув, ваҳима тугмалари, киришни назорат қилиш тизимлари ва лицензияланган қўриқлаш хизмати билан таъминланган.
Қозоғистонда фаолият юритаётган 8028 та мактабдан 6254 таси террористик таҳдидлар нуқтайи назаридан заиф объект сифатида таснифланган. Бу ҳақда Қозоғистон Республикаси Таълим вазирлиги маълум қилди.
Вазирлик маълумотларига кўра, мазкур тоифадаги барча мактаблар терроризмга қарши хавфсизлик бўйича белгиланган талабларга мувофиқ жиҳозланган.
Хусусан, таълим муассасаларида ички ишлар органларининг тезкор бошқарув марказларига уланган видеокузатув камералари, ваҳима тугмалари, киришни назорат қилиш ва бошқариш тизимлари мавжуд. Шунингдек, объектларда лицензияга эга қўриқлаш хизматлари ташкил этилган.
2025 йил охирида Қозоғистон Таълим вазирлиги Ички ишлар вазирлиги ҳамда маҳаллий ижро этувчи ҳокимият органлари билан ҳамкорликда мамлакатдаги барча мактабларнинг терроризмга қарши ҳимоя талабларига мувофиқлигини аниқлаш мақсадида аудит ўтказган.
Тегишли маълумотларга кўра, террористик таҳдидларга заиф объект сифатида таснифланган барча 6254 та мактаб белгиланган хавфсизлик талабларига жавоб беради.
Бундан ташқари, мактабларда ходимлар, ўқитувчилар ва ўқувчилар иштирокида фавқулодда вазиятларда ҳаракат қилиш бўйича мунтазам ўқув машғулотлари ўтказилади. Бундай тренинглар камида ҳар олти ойда икки марта ташкил этилиши белгиланган.
