Самарқанд ҳудудий электр тармоқларини туркиялик инвесторлар бошқаради

 

Самарқанд вилоятидаги ҳудудий электр тармоқларини бошқариш Туркиянинг Aksa Enerji компаниясига берилади. Бу ҳақда 13 август куни Президентга ёқилғи-энергетика ресурсларидан самарали фойдаланиш масалалари юзасидан тақдим этилган ахборотда маълум қилинди.

 

Энергетика вазири Шерзод Хўжаевнинг таъкидлашича, Ўзбекистонда илк бор тақсимлаш электр тармоқларини инвестиция киритиш шарти билан хусусий сектор бошқарувига бериш бўйича халқаро тендер ўтказилган. Унда Туркиянинг Aksa Enerji компанияси ғолиб деб топилган.

 

Лойиҳа доирасида компания Самарқанд вилоятидаги мавжуд электр тармоқларини эксплуатация қилиш билан бирга, янги тармоқларни қуриш, мавжуд инфратузилмани реконструкция ва модернизация қилиш ишларини амалга оширади.

 

Шунингдек, Самарқанд ҳудудий электр тармоқларида фаолият юритаётган барча ишчи-ходимлар компания тизимида иш билан таъминланиши кўзда тутилган. Вазир маълумотига кўра, хориждан атиги 10–15 нафар мутахассис жалб қилинади, қолган ишлар маҳаллий мутахассислар томонидан бажарилади.

 

Лойиҳада маҳаллий ишлаб чиқарувчиларни қўллаб-қувватлашга ҳам алоҳида эътибор қаратилади. Хусусан, Туркия компанияси Ўзбекистондаги фаолияти давомида тармоқларни қуриш, реконструкция ва модернизация қилиш учун зарур маҳсулотларнинг камида 90 фоизини ички бозордан харид қилиши кўзда тутилган.

 

Президент Самарқанддаги ушбу тажрибадан келиб чиқиб, келгусида электр тақсимлаш тармоқларини бошқаришда шундай ёндашувни бошқа ҳудудларда ҳам жорий этиш бўйича топшириқ берган.