Шавкат Мирзиёев “Ўзбекистон Президенти администрацияси тўғрисида”ги Конституциявий қонунни имзолади

 

Президент Шавкат Мирзиёев томонидан “Ўзбекистон Республикаси Президенти Администрацияси тўғрисида”ги Конституциявий қонун имзоланди.

 

Янги қонун билан Президент Администрациясининг ҳуқуқий мақоми, ваколатлари, вазифалари ҳамда давлат органлари билан муносабатлари қонун даражасида тартибга солинди.

 

Қонунга кўра, Президент Администрацияси давлат органи сифатида Президентнинг конституциявий ваколатларини ташкилий, ҳуқуқий ва таҳлилий жиҳатдан таъминлайди. Администрацияни Президент шакллантиради, у Президент белгилаган устувор йўналишларда фаолият юритади ҳамда Президентга бўйсунади ва ҳисобдор ҳисобланади.

 

Ҳужжат 4 боб ва 34 моддадан иборат бўлиб, унда Администрациянинг асосий вазифалари белгиланган. Жумладан, Президентнинг фармон, қарор ва фармойишлари лойиҳаларини тайёрлаш, уларнинг ижросини ташкил этиш ва назорат қилиш, мамлакатнинг ижтимоий-иқтисодий ҳамда ижтимоий-сиёсий ривожланишига оид янги ташаббусларни ишлаб чиқиш назарда тутилган.

 

Шунингдек, Администрация аҳоли ва тадбиркорлар билан очиқ ва тўғридан тўғри мулоқотларни ташкил этиш, уларнинг муаммоларига ечимлар ишлаб чиқиш, қонунларни Президент имзосига ёки қайтаришга тайёрлаш, Президентнинг Олий Мажлисга Мурожаатномасини ташкил этиш каби вазифаларни ҳам амалга оширади.

 

Қонун билан Президент Администрацияси раҳбарининг ҳуқуқий мақоми ва вазифалари, мансабдор ҳамда бошқарув ходимларини лавозимга тайинлаш ва озод этиш тартибларига оид нормалар ҳам белгиланди. Шунингдек, Президент ҳузуридаги Хавфсизлик кенгаши фаолиятини ташкил этишнинг ҳуқуқий асослари яратилди.

 

Администрация Президент фаолиятини ташкил этиш доирасида парламент, Ҳукумат, вазирлик ва идоралар, маҳаллий ҳокимликлар, суд ҳокимияти ҳамда судьялар ҳамжамияти органлари билан ҳамкорлик қилади.

 

Бундан ташқари, Администрация Президентга бевосита бўйсунувчи давлат органлари фаолиятини мувофиқлаштиради, уларни такомиллаштириш бўйича таклифлар ишлаб чиқади ва Президентга киритади.

 

Конституциявий қонуннинг қабул қилиниши Президентлик институтининг ҳуқуқий асосларини мустаҳкамлаш, давлат бошқаруви тизимининг самарадорлиги ва ҳисобдорлигини оширишга хизмат қилади.