Суриядаги жангариларга қўшилмоқчи шахс 10 йилга қамалди

 

Ижтимоий тармоқлар орқали террористик ташкилотлар тарғиботига тушиб қолган Ўзбекистон фуқароси суд ҳукми билан 10 йил муддатга озодликдан маҳрум этилди. Бу ҳақда ДХХ хабар берди.

 

Маълум бўлишича, 1995 йилда Қашқадарё вилоятида туғилган фуқаро 2017 йилда Жанубий Кореядаги нуфузли университетлардан бирига ўқишга кирган. Хорижда таҳсил олиш даврида у ижтимоий тармоқлар орқали «жиҳод», «ҳижрат» ва «шаҳидлик» каби тушунчаларни тарғиб қилувчи шахсларнинг аудио ва видеомаърузалари билан танишган.

 

Шунингдек, Суриядаги қуролли тўқнашувлар акс этган видеоматериалларни мунтазам кўриши натижасида унинг онгига ақидапарастлик ғоялари сингдирилган.

 

Шундан сўнг фуқаро Инстаграм ва Телеграм ижтимоий тармоқлари орқали Сурия ҳудудида фаолият юритган “Тавҳид ва жиҳод катибаси” ҳамда “Ғуроба катибаси” каби террористик ташкилотларга алоқадор шахслар билан мулоқот ўрнатган. Уларнинг ғояларини акс эттирувчи материалларни тарқатишда иштирок этган.

 

Университетни тамомлаганидан кейин ҳам Жанубий Кореяда қолган фуқаро “Ғуроба катибаси” террористик ташкилотининг медиа блогери сифатида фаолият юритган “Саад Мухтор”нинг интернет орқали амалга оширган тарғибот ва алдовларига ишонган. Натижада унга пул маблағларини юборган.

 

2023 йил декабрь ойида фуқаро Ўзбекистонга қайтиб келган. Бироқ шундан кейин ҳам террористик ташкилотлар билан боғлиқ режаларидан воз кечмаган.

 

2024 йил июль ойида у Суриядаги жангарилар сафига қўшилиш мақсадида Туркияга борган. Бироқ унинг ушбу режаси амалга ошмаган ва у ортга қайтган.

 

Ҳуқуқни муҳофаза қилувчи органлар томонидан ўтказилган тезкор тадбирлар давомида фуқаронинг мазкур фаолияти аниқланиб, у қўлга олинган. Унга нисбатан жиноят иши қўзғатилиб, тергов ҳаракатлари олиб борилган.

 

Суд ҳукмига кўра, у Жиноят кодексининг 244¹, 244², 155² ва 155³-моддаларида назарда тутилган жиноятларни содир этганликда айбли деб топилган.

 

Унга 10 йил муддатга озодликдан маҳрум қилиш жазоси тайинланган.