Ўзбекистонда лицензия олмасдан 3 ой тадбиркорлик қилиш мумкин бўлади
Бу муддатда улар лицензия талабларини бажариши ва тегишли ҳужжатни олиши ёки фаолиятини тўхтатиши керак.
Тадбиркорлик фаолиятини лицензия ёки рухсат бериш хусусиятига эга ҳужжат олмасдан вақтинча амалга ошириш имконини берувчи “Бизнесга лицензиясиз кириш” махсус режими жорий этилмоқда. Бу ҳақда Адлия вазирлиги хабар берди.
Мазкур режим доирасида талабгор ўз фаолиятини бошлашдан олдин махсус электрон тизим ёки Ягона интерактив давлат хизматлари портали (ЙИДХП) орқали ваколатли органни бепул хабардор қилиши мумкин.
Бунда лицензия ёки тегишли рухсат берувчи ҳужжатни олмасдан фаолият юритишга 3 ой муддатга имкон берилади. Ушбу давр мобайнида талабгор белгиланган фаолиятни лицензиясиз ёки рухсат берувчи ҳужжатсиз амалга оширганлиги учун жавобгарликка тортилмайди.
Махсус режимдан фойдаланган талабгор 3 ой давомида:
-
фаолиятини лицензия ёки рухсат бериш талаблари ва шартларига мувофиқлаштиради;
-
белгиланган тартибда тегишли лицензия ёки рухсат берувчи ҳужжатни олади ёки мазкур фаолиятни амалга оширишни тўхтатади.
Шунингдек, қонун билан махфий ҳужжатларни 30 йил давомида сақлаш муддати белгиланди.
Шахсий таркиб бўйича ҳужжатларни сақлаш муддатлари ҳам аниқлаштирилди. Унга кўра, 2019 йил 1 январгача иш юритилиши якунланган шахсий таркиб ҳужжатлари идоравий архивларда 75 йил, 2019 йил 1 январдан кейин шакллантирилган ҳужжатлар эса 50 йил давомида сақланади.
