Ўзбекистонга пул ўтказмалари 6 ойда 9,3 миллиард долларга етди
2026 йилнинг биринчи ярмида хориждан Ўзбекистонга юборилган маблағлар ҳажми ўтган йилнинг шу даврига нисбатан 13 фоизга ошди.
Марказий банкнинг “Жисмоний шахсларнинг валюта операциялари” бўйича 2026 йил И ярим йиллик таҳлилий шарҳига кўра, январь–июнь ойларида Ўзбекистонга келиб тушган пул ўтказмалари 9,3 миллиард долларни ташкил этди.
Ҳисобот даврида P2P ўтказмалар ҳажми ҳам сезиларли ошиб, 4,8 миллиард долларга етган. Бу кўрсаткич ўтган йилнинг мос даврига нисбатан 32 фоизга кўп.
Марказий банк пул ўтказмалари ўсишига меҳнат муҳожирлари фаолият юритаётган мамлакатларда ишчи кучига талаб ва иш ҳақининг юқори даражада сақланиб қолгани, шунингдек, миллий валюталарнинг умумий мустаҳкамлангани таъсир кўрсатганини қайд этди.
Шу даврда Ўзбекистондан хорижга юборилган пул ўтказмалари 1,3 миллиард долларни ташкил этиб, йиллик ҳисобда 8 фоизга ошган.
Валюта айирбошлаш операцияларида ҳам ўсиш кузатилди. 2026 йилнинг январь–июнь ойларида жисмоний шахслар билан боғлиқ валюта айирбошлаш операцияларининг умумий айланмаси 19,1 миллиард доллар бўлиб, бир йил аввалги кўрсаткичдан 31 фоизга юқори бўлган.
Банклар ҳисобот даврида аҳолидан 12,3 миллиард долларлик хорижий валютани сотиб олган ва 6,8 миллиард долларлик валютани сотган. Натижада жисмоний шахслар томонидан таклиф қилинган валютанинг соф ҳажми 5,5 миллиард долларни ташкил этган.
Марказий банк маълумотларига кўра, жисмоний шахслар сегментидаги соф валюта таклифининг умумий бозордаги улуши 26 фоиздан 29 фоизгача ошган. Шунингдек, масофавий хизматлар ва кеча-кундуз ишлайдиган валюта айирбошлаш банкоматлари орқали амалга оширилаётган операциялар ҳажмининг ортиши қайд этилган.
