Бойсундаги ўрмон хўжалигида ёнғин юз берди
Ёнғин 24 соат ичида бартараф этилган.
2026 йил 12 август куни соат 17:15 да «112» тизими орқали Бойсун тумани «Чилонзор» МФЙ ҳудудидаги “Бойсун давлат ўрмон хўжалиги”га қарашли «Хомкон» ўрмон бўлимида қуруқ ўт ва шох-шаббалар ёнгани ҳақида хабар келиб тушган.
Хабар асосида ҳодиса жойига Сурхондарё вилояти Фавқулодда вазиятлар бошқармаси ҳамда “Бойсун давлат ўрмон хўжалиги”нинг куч ва воситалари жалб этилган.
Ёнғинни бартараф этиш ишларига жами 309 киши ва 11 та техника жалб қилинган. Шундан Фавқулодда вазиятлар бошқармасидан 194 нафар шахсий таркиб ва 8 та техника, “Бойсун давлат ўрмон хўжалиги”дан 60 нафар ходим ва 3 та техника, шунингдек, 55 нафар маҳаллий кўнгилли фуқаро жалб этилган.
13 август соат 17:30 ҳолатига кўра, ёнғин тўлиқ бартараф этилган.
Дастлабки маълумотларга кўра, ёнғин оқибатида тахминан 1 гектар майдондаги қуруқ ўт ва шох-шаббалар ёнган.
Ҳодиса оқибатида фуқароларнинг тан жароҳати олгани ҳақида маълумот келиб тушмаган.
Айни пайтда ёнғиннинг келиб чиқиш сабаблари аниқланмоқда.
