Испанияда қуёш тутилишини кузатган 500 дан ортиқ киши шифокорга мурожаат қилди
Фуқаролар бош айланиши, ҳолсизлик, енгил жароҳатлар ва кўзлардаги ноқулайликлардан шикоят қилган.
Испанияда 12 август куни кузатилган қуёш тутилишидан сўнг 511 киши тиббий ёрдамга мурожаат қилган. Бу ҳақда El Mundo нашри маълум қилди.
Маълумотларга кўра, фуқароларнинг аксарияти бош айланиши, ҳолсизлик, хавотир, енгил жароҳатлар ва кўзлардаги ноқулайликлар юзасидан мурожаат қилган. Аксарият ҳолатларда беморларни шифохонага ётқизиш талаб этилмаган.
Ҳудудлар кесимида энг кўп мурожаатлар Каталонияда — 115 та, Мадридда — 101 та, Басклар мамлакатида — 58 та, Андалусияда — 44 та, Мурцияда — 32 та ва Арагонда — 30 та қайд этилган. Умуман, 17 та автоном ҳамжамиятда тиббий мурожаатлар кузатилган.
Шифокорлар қуёш тутилишини махсус ҳимоя воситаларисиз кузатиш кўз саломатлиги учун хавфли бўлиши мумкинлиги ҳақида огоҳлантирмоқда. Мутахассисларнинг қайд этишича, кўз шикастланишининг айрим белгилари дарҳол эмас, балки бир неча соат ёки ҳатто кун ўтиб намоён бўлиши мумкин.
Тутилиш арафасида махсус ҳимоя кўзойнакларига талаб сезиларли даражада ошган. Айрим фуқаролар эса ҳодисани кузатиш учун уй шароитида тайёрланган қурилмалар, пайвандлаш ниқоблари ва бошқа воситалардан фойдаланган.
