Қорақалпоғистонда яна бир “қочоқ ота” ушланди
Қарздор заправка ҳудудида ходимларнинг қонуний талабларига бўйсунмасдан, ўзга шахсга тегишли бўлган автомашинада воқеа жойидан қочишга уринган.
Қорақалпоғистонда алимент тўлашдан бўйин товлаб, яшириниб юрган ота заправкада қўлга тушиб, ходимлардан қочишга уринди. Бу ҳақида МИБ ахборот хизмати Zamon.uz'га маълум қилди.
Қайд этилишиа, МИБ Амударё туман бўлими иш юритувида мавжуд бўлган, Фуқаролик ишлари бўйича Амударё туман суднинг ижро ҳужжатига асосан ундирувчи С.Ш. фойдасига тарбиясидаги уч нафар фарзандларининг таъминоти учун қарздор М.Х. дан алимент ундириш белгиланган.
Қарздор томонидан алимент пуллари ҳар ой ўз вақтида тўлаб келинмаганлиги сабабли, ижро ҳужжати ижросини таъминлаш мақсадида, қарздорнинг яшаш манзилига бир неча маротаба борилганида, қарздор ушбу манзилда йўқлиги аниқланган.
Шу сабабли, унга нисбатан Бюронинг Амударё туман бўлими давлат ижрочиси томонидан қидирув эълон қилинган.
Мажбурий ижро бюроси Қорақалпоғистон Республикаси бошқармаси қидирув шуъбаси ва Ички ишлар ходимлари биргаликда жорий йилнинг 13 август куни ўтказилган тадбирда, қарздор Нукус шаҳридаги автомобилларга ёқилғи қўйиш шохобчасида юрганлиги аниқланган.
Бундан ташқари, қарздор ходимларнинг қонуний талабларига бўйсунмасдан, ўзга шахсга тегишли бўлган автомашинада воқеа жойидан қочишга улгурган. Бироқ, олиб борилган тезкор-қидирув тадбирлари натижасида, қарздор Амударё тумани ҳудудида қўлга олинган.
Ҳозирда қарздорнинг алимент тўловларидан 85,4 млн сўм қарзи мавжуд бўлиб, унинг жавобгарлик масаласи кўриб чиқилмоқда.
