“Ҳормуз бўғози Эронники бўлиб қолади” — Эрон
Эрон Доналд Трампнинг Ҳормуз бўғозини АҚШ ҳудуди деб эълон қилиш ҳақидаги баёнотига жавоб берди
Эрон АҚШ президенти Доналд Трампнинг Ҳормуз бўғозини келгусида “АҚШ ҳудуди” деб эълон қилиш ҳақидаги баёнотига кескин муносабат билдирди. Бу ҳақда Euronews хабар берди.
Трамп 15 август куни Нью-Йоркда сўзлаган нутқида АҚШ Эрон устидан “ғалабани якунлагач”, Ҳормуз бўғозини АҚШ ҳудуди деб эълон қилишини айтган. У, шунингдек, АҚШ кучлари бўғозда блокада ўрнатганини ва Вашингтон хоҳламаса, у ердан ҳеч бир кема ўта олмаслигини таъкидлаган.
Теҳрон эса бу баёнотни рад этди. Эрон ташқи ишлар вазирининг ҳуқуқий ва халқаро масалалар бўйича ўринбосари Козем Ғарибободий Ҳормуз бўғози Эрон бўғози бўлганини, ҳозир ҳам шундай эканини ва келгусида ҳам шундай бўлиб қолишини билдирган.
Унинг таъкидлашича, Эрон АҚШнинг таҳдидларига ва куч намойишига ён бермайди. Ғарибободий, шунингдек, Вашингтон Эроннинг мағлубияти ҳақидаги қарашларидан воз кечиши кераклигини таъкидлаган.
Ҳормуз бўғози Форс кўрфазини Уммон кўрфази ва Араб денгизи билан боғлайдиган стратегик сув йўли ҳисобланади. Мазкур йўналиш орқали жаҳон денгиз нефть ташувларининг қарийб чорак қисми ўтади. Шу сабабли бўғоз устидан назорат масаласи халқаро энергетика бозори учун ҳам муҳим аҳамиятга эга.
