Россия ёзда Украинанинг 19 та аҳоли пунктини эгаллаганини билдирди
Мудофаа вазирлиги Днипропетровск ва Запорижжя вилоятларидаги аҳоли пунктлари эгалланганини маълум қилган.
Россия қўшинлари 2026 йил ёзидаги ҳарбий кампания давомида Украинанинг жануби-шарқидаги 19 та аҳоли пунктини назоратига олган. Бу ҳақда Россия Мудофаа вазирлиги 15 август куни маълум қилди.
Вазирлик баёнотида айтилишича, аҳоли пунктлари Днипропетровск ва Запорижжя вилоятларида жойлашган. Бироқ Россия томони эгалланган аҳоли пунктларининг номларини очиқламаган. Россия Мудофаа вазирлиги бу маълумотни Шарқий қўшинлар гуруҳи қўмондони Пётр Болгаревнинг ҳисоботига асослаган.
Бундан ташқари, Россия кучлари Запорижжя вилоятидаги Рибалское аҳоли пунктини яқинда назоратига олгани ҳақида ҳам маълумот берилди. Бу хабарни Россиянинг Интерфакс агентлиги тарқатган.
Россия фронтдаги илгарилашлари ҳақида баёнот бераётган бир пайтда, Украина ҳам жануби-шарқий фронтда ҳудудларни қайтариб олаётганини билдирган. Украина президенти Владимир Зеленский 12 август куни йил бошидан буён мамлакат қуролли кучлари 745 квадрат километр ҳудудни Россия назоратидан қайтарганини маълум қилган. Унинг сўзларига кўра, Днипропетровск, Донетск ва Запорижжя вилоятлари туташган ҳудуддаги 26 та аҳоли пункти Украина назоратига қайтарилган.
Мустақил очиқ манбалар асосида жанг майдонидаги вазиятни кузатувчи DeepState ҳам Украина кучлари 19 та аҳоли пункти устидан назоратни тиклагани ва яна олти ҳудудда Россия қўшинларини ортга сурганини билдирган.
Маълумотларга кўра, Россия қўшинларининг фронтдаги умумий илгарилаши 2026 йилда аввалги даврларга нисбатан секинлашган. Шу билан бирга, Москва Украина пойтахти Киев ва бошқа шаҳарларга баллистик ракета зарбаларини ҳам кучайтирган.
