Шавкат Мирзиёев Руфат Рисқиевнинг вафоти муносабати билан ҳамдардлик билдирди
“Тошкент йўлбарси” номи билан танилган афсонавий боксчи 76 ёшда вафот этди.
Ўзбек бокс мактабининг атоқли намояндаси, жаҳон чемпиони, Олимпия ўйинлари совриндори, машҳур спортчи ва мураббий Руфат Асадович Рисқиев 15 август куни 76 ёшида вафот этди.
Президент Шавкат Мирзиёев Руфат Рисқиевнинг вафоти муносабати билан марҳумнинг оила аъзолари ва яқинларига ҳамдардлик билдирди.
Руфат Рисқиев 1949 йил 2 октябрда Тошкент вилоятида туғилган. У ёшлигидан бокс билан шуғулланиб, қисқа вақт ичида юксак маҳорат ва иродага эга спортчи сифатида танилган.
У 1974 йилги жаҳон чемпиони, 1976 йилда Монреал шаҳрида ўтказилган Олимпия ўйинларининг кумуш медали соҳиби, собиқ Иттифоқнинг тўрт карра чемпиони бўлган. Спортдаги ёрқин фаолияти туфайли у халқ орасида “Тошкент йўлбарси” номи билан машҳур бўлган.
Руфат Рисқиев Марказий Осиё мамлакатларида биринчи халқаро профессионал бокс ҳаками сифатида ҳам фаолият юритган. Кейинги йилларда мураббий ва ҳакам сифатида ўзбек бокс мактабининг ривожига катта ҳисса қўшган.
Унинг мамлакат спортини ривожлантиришдаги хизматлари давлат томонидан муносиб тақдирланиб, “Эл-юрт ҳурмати” ва «Дўстлик» орденлари билан мукофотланган.
Руфат Рисқиевнинг ўзбек спорти, хусусан, бокс ривожига қўшган улкан ҳиссаси, ёш авлод тарбиясидаги хизматлари ва ёрқин хотираси халқимиз қалбида ҳамиша сақланиб қолади.
