Тошкент ҳайвонот боғида эркак шер ва жайраларга тош отди
Ҳолат юзасидан видеокузатув ёзувлари ўрганилиб, шахсни аниқлаш чоралари кўрилмоқда.
13 август куни Тошкент ҳайвонот боғида ташриф буюрувчилардан бирининг ҳайвонларга нисбатан шафқатсиз муносабатда бўлгани қайд этилди.
Маълум қилинишича, эркак ташриф буюрувчи шер Алекс ва жайраларга тош ота бошлаган. Жайралар волери очиқ бўлгани сабабли ташланган тошларнинг айримлари ҳайвонларга теккан.
Ҳолатнинг яна бир ачинарли жиҳати шундаки, эркакнинг ҳаракатларини унинг фарзанди ҳам такрорлаб, ҳайвонларга тош ота бошлаган. Айрим ташриф буюрувчилар эса тошлар ҳайвонларга текканидан сўнг қарсак чалган.
Айни пайтда жайраларнинг ҳолати ветеринария мутахассислари томонидан текширилмоқда.
Ҳайвонот боғи маъмурияти томонидан ҳодиса юзасидан видеокузатув камераларидаги ёзувлар ўрганилмоқда. Ҳайвонларга тош отган шахсни аниқлаш бўйича тегишли чоралар кўрилмоқда.
