Тошкентда фуқаро МИБ орқали қурувчига тўлаган пулини қайтариб олди

Фуқаролик ишлари бўйича Яккасарой туманлараро судининг 2026 йил 10 июндаги ижро варақасига асосан қарздор қурувчи ташкилотдан ундирувчи фуқаро Б.В. фойдасига жами 323 391 000 сўм пул маблағини ундириш тўғрисидаги ижро ҳужжати Мажбурий ижро бюросининг Сергели туман бўлими иш юритувига 2026 йил 11 июнь куни келиб тушган.

 

Мазкур маблағ фуқаро Б.В. томонидан қурилиш ташкилотига уй-жой сотиб олиш мақсадида бошланғич тўлов сифатида амалга оширилган бўлиб, қурилиш ташкилоти томонидан уй белгиланган муддатда топширилмаганлиги сабабли суд қарорига асосан фуқаро фойдасига ундирилиши белгиланган.

 

Давлат ижрочиси томонидан қонунчиликда белгиланган тартибда ижро иши қўзғатилиб, қарздорга ихтиёрий муддатда қарздорликни тўлаш ҳақида тегишли талабнома юборилган.

 

Бироқ белгиланган муддатда қарздорлик ихтиёрий равишда қопланмаганлиги сабабли мажбурий ижро ҳаракатларига киришилган.

 

Бюронинг туман бўлими томонидан амалга оширилган мажбурий ижро ҳаракатлари натижасида қарздордан 323 391 000 сўм пул маблағи тўлиқ ундирилиб, фуқаро Б.В.нинг тегишли ҳисоб рақамига ўтказиб берилган.

 

Қарздорлик тўлиқ қопланганлиги муносабати билан мазкур ижро иши Ўзбекистон Республикасининг “Суд ҳужжатлари ва бошқа органлар ҳужжатларини ижро этиш тўғрисида”ги Қонунининг 41-моддасига асосан тамомланган.