Трамп Камала Харрисни яна президентликка номзод кўрсатишни таклиф қилди
У Харриснинг Байден маъмуриятидаги фаолиятини, жумладан, чегара сиёсатидаги ролини танқид қилди.
АҚШ президенти Доналд Трамп Демократик партиядаги сиёсий рақибларига 2024 йилги президентлик сайловларида унга мағлуб бўлган Камала Харрисни яна президентликка номзод сифатида кўрсатишни таклиф қилди.
Трамп Нассау округи полиция академиясида сўзлаган нутқида Харриснинг Жо Байден маъмуриятидаги вице-президентлик фаолиятига тўхталган. У Харрисни, хусусан, АҚШнинг жанубий чегарасидаги вазият учун масъуллардан бири сифатида тилга олган.
Америка президенти Харрис чегара назорати билан боғлиқ вазифаларни бажарган бўлсада, чегара ҳудудига бормагани ва АҚШ Божхона ва чегара ҳимояси хизмати билан бевосита боғланмагани ҳақида гапирган.
Трамп бу фикрларини кинояли оҳангда давом эттириб, Харриснинг фаолиятини истеҳзо билан баҳолаган ва Демократик партия уни яна президентликка номзод қилиб кўрсатиши кераклигини айтган.
Камала Харрис 2024 йилги президентлик сайловларида Демократик партиядан номзод бўлган ва Доналд Трампга мағлуб бўлган. Трамп ушбу сайловда ғалаба қозониб, АҚШ президентлигига иккинчи марта сайланган.
