Ўзбек боксининг афсонаси Руфат Рисқиев вафот этди
У ўзбек боксидан жаҳон чемпионлиги ва Олимпиада медали соҳиби бўлган илк боксер сифатида тарихда қолган.
Ўзбекистон спорти оғир жудоликка учради. Афсонавий боксер, 1974 йилги жаҳон чемпиони ва 1976 йилги Олимпия ўйинларининг кумуш медали совриндори Руфат Рисқиев 76 ёшида вафот этди.
Бу ҳақда Миллий Олимпия қўмитаси матбуот котиби Зафар Имомхўжаев маълум қилди.
Руфат Рисқиев ўзбек боксининг ривожига катта ҳисса қўшган спортчилардан бири бўлиб, фаолияти давомида «Тошкент йўлбарси» номи билан шуҳрат қозонган. У Олимпия ўйинлари ва жаҳон чемпионатларида совриндор бўлган илк ўзбек боксёри сифатида тарихда қолган.
У 1974 йилда жаҳон чемпиони бўлган, 1976 йилги Монреаль Олимпия ўйинларида эса кумуш медални қўлга киритган. Шунингдек, АҚШ, Куба, Австрия, собиқ Югославия ва Испанияда ўтказилган қатор нуфузли халқаро турнирларда ғолибликни қўлга киритган.
Спортчилик фаолиятидан сўнг ҳам Руфат Рисқиев ўзбек боксига хизмат қилишда давом этди. У Марказий Осиёдаги илк халқаро тоифадаги профессионал бокс ҳаками сифатида ҳам фаолият юритган.
Руфат Рисқиев мамлакат спорти олдидаги хизматлари учун «Ҳурмат белгиси», «Буюк хизматлари учун» ва «Эл-юрт ҳурмати» орденлари билан тақдирланган.
2016 йилда соғлиғи билан боғлиқ жиддий муаммолар сабабли Тошкент шаҳридаги 16-шifoxonada унга жарроҳлик амалиёти ўтказилган эди.
