Ўзбекистон ва Туркманистон тўғридан-тўғри авиақатновларни тиклаши мумкин

 

13 август куни Ўзбекистон ва Туркманистон вакиллари ўртасида икки давлатнинг транспорт-логистика соҳасидаги ҳамкорлигини ривожлантириш масалаларига бағишланган учрашув бўлиб ўтди.

 

Учрашувда Ўзбекистон транспорт-логистика соҳаси вакиллари ҳамда Туркманистоннинг Ўзбекистондаги Фавқулодда ва Мухтор Элчиси Шадурди Мередов иштирок этди.

 

Музокаралар давомида, хусусан, ҳайдовчилар учун визаларни электрон шаклда расмийлаштириш, тўловларни оптималлаштириш, Фарап–Олот чегара ўтиш пунктидаги жараёнларни такомиллаштириш, шунингдек, навбатлар ва кутиш вақтларини қисқартириш масалалари муҳокама қилинди.

 

Шунингдек, тез бузиладиган маҳсулотларни ташиш учун алоҳида коридор ташкил этиш, нейтрал ҳудудда иккинчи кўприк қуриш ҳамда Туркманбоши порти орқали автомобиль ва темир йўл ташувларини жадаллаштириш бўйича таклифлар билдирилди.

 

Томонлар вазн-габарит чекловларини қайта кўриб чиқиш масаласини ҳам кўриб чиқди. Музокараларда Ўзбекистон ва Туркманистон ўртасида тўғридан-тўғри авиақатновларни қайта тиклаш масаласига ҳам алоҳида эътибор қаратилди.

 

Туркман томони билдирилган таклифларни кўриб чиқиш ва уларни тегишли давлат органларига етказишга тайёрлигини маълум қилди.

 

Учрашув якунида икки давлат ўртасидаги транспорт-логистика алоқаларини янада ривожлантириш ҳамда ташувчилар учун қулай шарт-шароитлар яратиш бўйича ҳамкорликни давом эттиришга келишиб олинди.