Туркияда ёзги мавсумнинг энг машҳур миллий таомлари маълум қилинди

Туркияда гастрономик туризмга қизиқиш ортиб, маҳаллий ва анъанавий таомлар сайёҳлар учун мамлакатга ташриф буюришнинг муҳим сабабларидан бирига айланмоқда. Айниқса, ёз ойларида енгил ва тетиклантирувчи миллий таомларга талаб юқори.

 

Тадқиқотларга кўра, бу ёзда саёҳат ва туризм 79 фоиз кўрсаткич билан ҳордиқ чиқаришнинг энг оммабоп йўналиши бўлган. Таомлар билан боғлиқ машғулотлар 70 фоиз, очиқ ҳаводаги фаолиятлар эса 69 фоизни ташкил этган.

 

 

Туркиянинг ёзги дастурхонида янги сабзавот ва мевалар, зайтун мойи, хушбўй кўкатлар ҳамда денгиз маҳсулотлари муҳим ўрин тутади. Совуқ шўрвалар, зайтун мойида тайёрланган сабзавотли таомлар, салатлар ва уй ичимликлари иссиқ кунларда айниқса машҳур.

 

Шарқий Онадўлига хос “айран аши” қатиқ, нўхат ва буғдойдан тайёрланадиган совуқ шўрва бўлиб, ёзда истеъмол қилинадиган анъанавий таомлардан бири ҳисобланади. Ушбу таомни мамлакатнинг йирик шаҳарларидаги анъанавий ошхоналарда ҳам учратиш мумкин.

 

 

Эгей минтақасида эса зайтун мойида тайёрланадиган яшил ловия, қовоқча, артишок ҳамда маҳаллий кўкатлардан тайёрланган таомлар кенг тарқалган. Долма, сарма, чўпон салати, кисир, мужвер ва мержимек кўфтеси ҳам ёзги дастурхоннинг машҳур таомлари қаторидан жой олган.

 

Туркияда уй таомларини татиб кўриш учун “esnaf lokantaları” ҳам сайёҳлар орасида машҳур. Ушбу ошхоналарда ҳар куни янги тайёрланадиган, оилавий рецептларни эслатувчи таомлар нисбатан ҳамёнбоп нархларда таклиф этилади.

 

 

Ёзги мавсумнинг машҳур десертларидан бири эса Мараш музқаймоғи ҳисобланади. Эчки сутидан тайёрланадиган ушбу музқаймоқ қуюқ ва чўзилувчан тузилиши, шунингдек, секин эриши билан ажралиб туради.

 

Мутахассислар ва туризм соҳаси вакилларининг таъкидлашича, Туркиянинг гастрономик мероси мамлакатнинг денгиз бўйи курортлари, қадимий шаҳарлари ва тоғли ҳудудларига саёҳатни янада жозибадор қилмоқда.