Муддатли тўлов хизматлари операторлари фаолияти йўлга қўйилади

Ўзбекистонда муддатли тўлов хизматларини кўрсатиш тартиби ўзгаради. Президентнинг 2026 йил 14 августдаги “Аҳолига муддатли тўлов хизматлари кўрсатилишини такомиллаштириш чора-тадбирлари тўғрисида”ги ПҚ-294-сон қарори билан соҳа учун янги қоидалар белгиланди. Бу ҳақда Адлия вазирлиги хабар берди.

 
Қарорга кўра, 2027 йил 1 январдан муддатли тўлов хизмати операторлари фаолияти йўлга қўйилади. Банклар ва микромолия ташкилотларидан ташқари, муддатли тўлов хизматларини кўрсатувчи юридик шахслар оператор деб эътироф этилади.

 
Бундай ташкилотлар муддатли тўлов хизматларини кўрсатиши учун Марказий банк томонидан шакллантириладиган махсус реестрга киритилиши керак. Банклар ва микромолия ташкилотлари Марказий банкни хабардор қилиш орқали, бошқа юридик шахслар эса Марказий банкда ҳисоб рўйхатидан ўтиш орқали реестрга киритилади.

 
Қарорда муддатли тўлов хизматининг объектларига ҳам чекловлар белгиланган. Жумладан, кўчмас мулк, шунингдек қонунчиликка мувофиқ муомаладан чиқарилган ёки муомалада бўлиши чекланган бошқа мол-мулк муддатли тўлов объекти бўлиши мумкин эмас.

 
Операторларга молиявий истеъмол кредитларини ажратиш ҳамда жисмоний шахслардан пул маблағларини жалб қилиш тақиқланади.

 
Шунингдек, муддатли тўлов хизматлари бўйича талаб қилиш ҳуқуқидан фақат бошқа муддатли тўлов хизмати оператори, микромолия ташкилоти ёки банк фойдасига воз кечиш мумкин бўлади.

 
Янги тартиб муддатли тўлов хизматларини кўрсатувчи ташкилотларнинг фаолиятини тартибга солиш ва ушбу бозор иштирокчиларининг ҳуқуқий мақомини аниқ белгилашга қаратилган.