“Одил судлов – 2030”: суд тизимида янги ислоҳотлар босқичи
2027–2030 йилларда барча туман ва шаҳарларда фуқаролик ишлари бўйича судлар ташкил этилади.
Президент Шавкат Мирзиёев томонидан “Одил судлов – 2030”: Янги Ўзбекистонда инсон ҳуқуқларини ишончли ҳимоя қилувчи халқчил ва адолатли суд тизимини барпо этиш стратегияси тўғрисидаги Фармон қабул қилинди.
Мазкур ҳужжат суд-ҳуқуқ тизимини янада такомиллаштириш, фуқароларнинг одил судловга эришиш имкониятларини кенгайтириш ҳамда суд ҳокимиятининг мустақиллиги ва самарадорлигини мустаҳкамлашга қаратилган.
Стратегияда суд тизимини аҳолига янада яқинлаштиришга алоҳида эътибор қаратилган. Хусусан, 2027–2030 йиллар давомида республиканинг барча туман ва шаҳарларида фуқаролик ишлари бўйича судларни босқичма-босқич ташкил этиш кўзда тутилмоқда.
Фуқаролик ишлари бўйича Мирзо Улуғбек туманлараро суди судьяси Феруза Жўраеванинг таъкидлашича, мазкур ташаббус фуқароларнинг суд ҳимоясидан фойдаланиш имкониятларини янада кенгайтиради.
“Бу, аввало, чекка ҳудудларда яшовчи фуқароларнинг суд ҳимоясига эришишини кенгайтириш ҳамда одил судловни аҳолига янада яқинлаштириш нуқтаи назаридан муҳим аҳамият касб этади”, — дея қайд этди судья.
Янги ёндашув фуқароларнинг ўз ҳуқуқ ва қонуний манфаатларини ҳимоя қилиш учун судга мурожаат қилиш имкониятларини кенгайтириш, суд хизматларидан фойдаланишни қулайлаштириш ва одил судловнинг аҳолига яқинлигини таъминлашга хизмат қилади.
