Омскдаги ёнғинда жароҳатланган икки ўзбекистонликнинг аҳволи оғир экани маълум қилинди
Улардан бири сунъий нафас олиш аппаратига уланган, иккинчиси ҳам реанимация бўлимида даволанмоқда.
Россиянинг Омск шаҳрида қурилаётган бинода юз берган ёнғин оқибатида жароҳатланган икки нафар Ўзбекистон фуқаросининг аҳволи оғир экани маълум қилинди. Бу ҳақда «Дунё» ахборот агентлиги хабар берди.
Ўзбекистоннинг Новосибирск шаҳридаги бош консули Аслам Акбаров 16 август куни Омск шаҳридаги 1-сонли тез тиббий ёрдам шифохонасига бориб, 15 август куни “Квартали Драверт” ҳудудида юз берган ёнғинда жабрланган Ўзбекистон фуқароларининг ҳолидан хабар олган.
Шифокорлар маълумотига кўра, И.З. куйиш жароҳатлари сабаб реанимация бўлимига ётқизилган. Унинг аҳволи оғир бўлиб, сунъий нафас олиш аппаратига уланган.
Иккинчи фуқаро — О.Э. ҳам реанимация бўлимида даволанмоқда. Унинг аҳволи ҳам оғир деб баҳоланмоқда.
Айни пайтда россиялик шифокорлар москвалик мутахассислар билан видеоконференция орқали тиббий консилиум ўтказиб, жабрланганларнинг даволаниш жараёнини мувофиқлаштирмоқда.
Мазкур ҳолат Ўзбекистоннинг Новосибирск шаҳридаги Бош консулхонаси томонидан алоҳида назоратга олинган.
