Президент “Тилло домор” корхонасининг янги ишлаб чиқариш мажмуаси фаолияти билан танишди
Корхонада 70 дан ортиқ турдаги сут маҳсулотлари ишлаб чиқарилиб, йилига қарийб 100 миллиард сўмлик маҳсулот тайёрланади.
Президент Шавкат Мирзиёев Урганч туманидаги “Тилло домор” корхонасининг янги ишлаб чиқариш мажмуасида сутни қайта ишлаш ва тайёр маҳсулот ишлаб чиқариш жараёни билан танишди.
Корхонанинг умумий қиймати 11 миллион доллар бўлиб, йилига қарийб 100 миллиард сўмлик маҳсулот ишлаб чиқариш қувватига эга. Мажмуа Болгариядан келтирилган замонавий технологик ускуналар билан жиҳозланган.
Бу ерда пишлоқ, қаймоқ, сметана, творог, қатиқ, кефир каби 70 дан ортиқ турдаги сут маҳсулотлари ишлаб чиқарилмоқда. Хомашё ҳар куни 100 дан зиёд фермер хўжалиги ва аҳолидан харид қилиниб, чорвачилик билан шуғулланувчилар учун барқарор сотув бозори яратилмоқда.
Корхонада 120 та иш ўрни ташкил этилган. Ишлаб чиқариш мажмуасига 100 киловатт қувватга эга қуёш панеллари ҳам ўрнатилган. Келгусида маҳсулот турларини кенгайтириш ва яна 100 та янги иш ўрни яратиш режалаштирилган.
Президент маҳаллий хомашёни чуқур қайта ишлаш, юқори қўшилган қийматли маҳсулотлар ишлаб чиқаришни кўпайтириш ҳамда корхоналарни хомашё билан барқарор таъминлаш муҳимлигини таъкидлаган.
Масъулларга тадбиркорлик ташаббусларини қўллаб-қувватлаш, ишлаб чиқариш ҳажми ва маҳсулот турларини ошириш бўйича тегишли топшириқлар берилган.
