Словакия, Германия ва Жанубий Кореяга ишга юборишни ваъда қилганлар ушланди
Улардан бири 85 млн сўм, бошқалари эса 4 минг ва 5 900 АҚШ доллари олаётган вақтида қўлга олинган.
Давлат хавфсизлик хизмати, Иқтисодий жиноятларга қарши курашиш департаменти ва ички ишлар органлари ходимлари ҳамкорлигида ўтказилган тезкор тадбирлар давомида фуқароларни хорижга ишга юбориш билан боғлиқ бир қатор фирибгарлик ҳолатларига чек қўйилди.
Жумладан, Тошкент шаҳрида яшовчи, 1985 йилда туғилган, муқаддам судланган шахс Қашқадарёда истиқомат қилувчи 6 нафар фуқарони Словакияга ишга юборишни ваъда қилиб, бунинг эвазига 145 млн сўм талаб қилган. У олдиндан 85 млн сўм олаётган вақтида ашёвий далиллар билан ушланган.
Бошқа ҳолатда Тошкент шаҳрида хорижий давлатларга виза олиш бўйича консалтинг хизматлари кўрсатувчи МЧЖ раҳбари 2002 йилда туғилган фуқарони виза расмийлаштириш орқали Германияга ишга юборишни ваъда қилиб, ундан 4 минг АҚШ доллари олган вақтида қўлга олинган.
Шунингдек, Тошкент вилояти Зангиота туманида яшовчи, 1993 йилда туғилган аёл Ангрен шаҳрида истиқомат қилувчи 2000 йилда туғилган фуқарони виза расмийлаштириш орқали Жанубий Кореяга ишга юборишни ваъда қилиб, 5 900 АҚШ доллари олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари олиб борилмоқда.
